六年了，我與『你』相處了六年啦。突然既離開，我真係未能接受。

雖然一早就知『你』時日冇多，但當真係離開時，我個心就好似被挖空一樣。

以往，我放工/去完街返屋企，『你』總會吵著要抱抱。
如今，我回到家裹，沒有『你』的嘈吵，『你』靜靜地坐在婆婆旁邊。

以往，我在房睇電視時，『你』會扭抱，靜靜訓係我旁，陪我睇電視。
如今，在旁邊還會慣性留下空位，但再沒有『你』的陪伴，異常寂寞。

以往，我在廳睇電視時，『你』會係我唔為意既時候，霸佔我個位。
如今，再沒有會與我爭位的情況出現，好不習慣。

以往，我沖涼時，『你』會係門口靜靜等候我出黎，然後一齊返房。
如今，我沖完涼出黎，沒有『你』的陪伴，自己默默返房。

以往，在我訓覺時，『你』會在我旁邊陪住我訓。
如今，我旁邊的床仔還在，但『你』已不在了。

『你』的離開我真係的好傷心，雖然『你』一開始就不是我照顧，但這六年入面，我盡心盡力地照顧『你』，在家中，『你』最癡果個係我，最聽我話，無論咩時候，『你』都會陪係我身邊，開心、唔開心、煩腦......你都會默默在我身邊守護住我。

『你』離開我已2天，返工時，我與平時無異，但回到家，在房入面，眼淚不自覺地流，我真係好掛住『你』

BB仔，你要快D投胎唷，下世搵一個好主家。
唔好再跟著以前的主人一樣，把你打到唔似狗形。
令『你』過著如黑暗般的生活。
我唔知帶『你』返屋企是否正確，但現在有婆婆陪係你身邊，我好安心丫。
記住 - 唔好唔記得我唷~~